صباح الخير وكل سنه والناس كلها كويسه واللي عنده مشكله يكون حلها وربنا كرمه
بالصدفه لائبت اني جيت في اول يوم في السنه وكنت عايز اكتب حاجه بس قلت لا ده اول يوم في السنه الجديده هنرفز الناس ليه واحرق دمهم ودمي معاهم ليه فقلت اكتب كلام للكلام مش لازم مش لازم عناد ونكش ونغز
يعني اللي هكتبه ده حكاية حد قالها ليه او ............
يعني مش لازم نتعب نفسنا ونرد عليها عشان هيا كلام للكلام بس
عشان نبتدي صح هكتب كلام الشاب اللي حكي بالاحمر وكلامي بالازرق متهيألي مافيش اسهل من كده وبداية الحكايه بالاسود.
نبتدي في يوم بعد ما خلصت شغل وخلاص هموت وعايز انام ولو عليه عايز حد يشلني يطلعني السلم ويحطني علي السرير هوب لائبت حد بينده يا محمد يا محمد ألبي وئع في رجلي مش عارف ابص اشوف مين اللي بينده ولا اطنش واطلع انام الساع 2 بالليل مين البارد اللي جاي بينده دلوئتي مش عارف ابص من الشباك ولا اطلع وهوا مش راضي يسكت يا محمد يامحمد هيصحي الحته كلها
المهم قلت مابدهاش لازم ابص واشوف مين بصيت
ايه يا فلاااااااااااان استنا طيب انزل افتح ليك نزلت ومش عارف نزلت ازاي المهم قتحت ليه الباب أموااااااااااااااه امواااااااااااااااااااه ازيك عامل ايه كويس ايه محدش بيشوفك ليه ظروف طيب اطلع تعالا وعمال اقول في نفسي يارب يقول لا
لأأ لأألأا لأالأ لكن كبسني وطلع
ايه يابني فينك من زمان ماشوفتك هوا بقي.......اهو في الدنيا انتا اللي ما بتتصلش ولا بتسأل علي حد
انا ....... معلش انا عارف اني مئصر في حئك بس غصب عني واللهي
هوا ولا يهمك ا نا قلت اجي اشرب معاك سيجارتين واعد معاك شويه
انا...ياااااااااااااه انتا تنورني المهم جبت البفره والسجاير وكوبايه والولاعه لا وشغل ت محمد منير يلا ماهي ليليه شكلها مافيهاش نوم في نفسي ده كله
تلف انتا ولا الف انا
لا لف انتا عشان انا مش فايق وتعبان
لا سلامتك ايه مالك شكلك زعلان اوي وعايز تعيط
لا مافيش شوية مشاكل بس
كبر دماغك ياعم وعيش اللحظه اللي انتاا فيها المشاكل مش هتخلص خد ولع الجيوان ده
الواد ولع زي ما يكون بيولع في الدنيا كلها خد نفس زي مايكون بينتحر مش بياخد نفس
ايه يابني براحه انتا بتنتحر ايه ده سجاره مش واحد بتموته
اداني السجاره وايده بتترعش وخلاص الدموع نازله من عينه والواد خلاص مش قادر زي مايكون كان ماسك نفسه 20 سنه من العياط
ايه ده اايه ده مالك يابني ليه كده اهدي طيب اهدي
ياعم مافيش حاجه تستاهل طول ما انتا في نفس واهلك بخير اهدي اهدي اجيب ليك تشرب
وبرضه عمال يعيط المهم فين وفين عؤبال ما اعصابه هديت وبطل عياط
اديته يولع السجاره التانيه
ايه مالك بقي احكي بابني فضفض يمكن ترتاح بس هات اخد نفس من السجاره ابل ما تخلص عليها
المهم اعدنا نلف ونشرب وهوا ابتدي يتكلم وانا اسمع
اكتشفت اني ضيعت كل حاجه حلوه في حياتي
ليه يابني ما انتا كويس اهو شغال وعايش وبتلبس احلي لبس وبتاكل احسن اكل وكل اللي بتحبهم بخير عايز ايه تاني
كل اللي بحبهم هما فين
هوا ايه اللي هما فين اهلك واخواتك كويسين كفايه وانتا
الحكايه مش حكاية اهلي وبس انسان محتاج لناس تاتيه غير اهله يحبوه ويحبهم شوف انتا لما تعيش عمرك كله بتدور علي حد تحبه ويحبك وكل ماتلائي حد وتحبه تبص ما تلائيهوش جبك تلائيه اختفي من وانا عيل من وانا عندي 5 سنين وانا بدور
ايه ده ايه ده انتا هتحكي من اول ما كان عندك 5 سنين يا نهار ابوك ابيض ده انا عايز 5 سنين اسمعك وعايز طن حشيش عشان اصبر عليك
ضحك اوي
ايوه ياعم كده اضحك ماتحطش في بالك من وانتا عندك 5 سنين كمل ليلتك ليله
شوف لما تبقي انتا في السن ده وكل يوم تصحي الصبح بدري يمكن ابل ما العصاقير حتي تصحي وتخرج من الشقه وتطلع فوء السطوح وباب السطوح مقفول تتشعبط علي السور عشان تنط وتخش السطوح وانتا عيل صغير يعني ممكن توئع تتكسر رئبتك كل ده عشان تخش ورشة خالك وتجيب ورقة من كتالوج ايطالي بتاع الشنط عشان تعمل دبور وتجيب بكرة خيط
يعني المشكله في الدبور ولا في بكرة الخيط
مش عارف زعل ليه حس اني بتريأ عليه صعب عليه وقلت ليه
خلاص واللهي مش هتكلم كمل وخد ولع
تعمل الدبور وتجيب بكرة الخيط وعايز تنزل مش عارف باب البيت مقفول بالجنزير تنط علي بيت الجيران عشان تخرج من الباب عندهم
اخد بعضي واخرج جري لحسن حد يمسكني ويطلعني لأمي تضربني
اطير في الشارع وانا بطير الدبور وابعد عن الحته بتاعتنا اوي اوي لحد ما اروح المنطئه بتاعت الشهداء والخيط يخلص والدبور يضيع في السما واعد في الشمس العب مع نفسي
كل يوم اعمل الحكايه كل يوم لحد ما في يوم بعد ما الدبور اطع وضاع وانا اعد في الشارع في وسط الحيشان والمدافن
لئيت عيلين خارجين منت حوش وكل واحد منهم شايل كيبس نايلون في نبأ
عارف النبأ
اه عارفه البتاع الصغير ده اللي بتاكل ومسكر كنت بجيبه وانا صغير
ايوه قربت من العيال وقلت ليهم ادوني شويه
العيال قالت ليه لا خش جيب ليك من الحوش مكدبتش خبر ودخلت الحوش ادور علي الشجره اللي فيها النبأ الحوش كان كل شجر يا محمد فين وفين عؤبال ما لئيت شجرة النبأ بس لئيت معاها كلب بيجري ورايه طلع اجري والحوش كبير
ومش عارف استخبي من الكلب فين لحد ماليت ادامي واحده بنت شايله صفيحة ميه جريت عشان استخبي فيها ووئعت الميه منها وغرئت انا وهيا وانا عمال اعيط ومستخبي ورا ضهرها وماسك في الجلابيه بتاعتها وعمال اعيط وقول ونبي ونبي والكلب عمال يهوهو هشت الكلب ومشته ومسكتني من ايدي واعدت تغسل ليا وشي وايدي من مطرح التراب لما وئعت والطينه وانا عمال اعيط خدتني ف ي حضنها وانا عمال اترعش من الخوف كل ده وانا مش باصص ليها اول ما بصيت لئيت مش عارف لئيت ملاك قمر بدر مش عارف اقول ليك ايه ايه ده ايه الحنيه والجمال ده مش ممكن هشوف انسانه تاني كده نسيت نفسي في حضنها
ايوا ايوا حضن ليك حق كان عندها بقي كام سنه
كان عندها يجي بتاع 17 سنه
ايه 17 سنه وانتا عندك 5 سنين
ايوه الموضوع مش موضوع سن انا م ش عارف اوصف ليك ازاي هيا كانت عامله ازاي ولما خدتني في حضنها حسيت بأيه تخيل عيل عنده 5ر سنين ويحس بحضن واحده
خدتني من ايدي بعد ما هديت ودخلت بيا الشقه عشان تسرح ليا شعري وجابت ليا نبأ واعدت تحط في جيوبي كل ده من غير ما تتكلم ولا كلمه ولا تنطأ بحرف طلعت خرسا خرسا يا محمد هاله طلعت خرسا مكنتش عارف يعني ايه خرسا كنت فاكرها مش راضيه تكلمني
خدتني ومشيت معايه عشان تروحني وتوصلني لحد البيت وانا ماشي معاها كل الشباب هبا هبا هبا واعدين يعاكسوها وهيا عماله تمد وماسكه ايدي وسحباني ورارها لحد ما وصلتني لحد البيت
طلعت البيت انا مش عارف مالي زي ما اكون كنت في حلم
عرفت من امي يعني ايه خرسا يعني ما بتتكلمش ولا بتسمع وعرفت اسمها هاله
بئيت كل يوم اروح عندها واعد من الصبح لحد المغرب نروح ونيجي مع بعض متهيألي نسيت الكلام عشان مكنتش محتاج ليه معاها كنت بلعب معاها واحط راسي علي رجلها وانام وتفضل تلعب في شعري
كل يوم انا وهيا نعمل برواز البخت والحظ لجدها اللي كان شغال فراش في المدرسه وكان بيجي العصر من المدرسه يرش الشاراع كله ميه اللي هيا بتملاها وتبقي هدومها كلها متغرأه ويعد بعد كده يسمع ام كلثوم وانا وهيا نعمل برواز البخت
ونحط فيه الفلوس بتاعتن جدها شلنات وبرايز وارباع جنيهات وناخد لينا انا وهيا جنيه من الفلوس ونروح نشرب حمص من درب الساقيه
كل يوم علي كده يا محمد لحد مدخلت المدرسه بئيت اجي من المدرسه عليها هيا مش علي البيت وافضل معاها لحد العصر اروح البت وارجع ليها تاني
لحد ما في يوم جيت من المدرسه مالئتهاش ولا هيا ولا جدها لئيت باب الحوش مقفول بئيت هتجنن مش عارف فيه ايه اعدت ادام الباب لحد ما ليئت عربيات جايه
كتيره وئفت ادام الحوش ونزلت ناس منها لابسين اسود وهيا معاهم ولابسه اسود جريت عليها ومسكت وحضنتها من رجلها وانا بعيط وهيا مش قادره تقف كانت عامله زي ورقة السجره اللي وئعت مش عارفه تقف علي رجلها ومموتها نفسها من العياط والناس ماسكينها لتؤع ووشها احمر دم من كتر العياط
انا كمان كنت هموت عاشنها مش عارف في ايه مش فاهم مالها كل اللي طالع عليه عمال اطبطب عليها واعد جمبها نفسي تقولي في ايه مالها مش عارف عايز اخدها في حضني لحد ما نمت وخدت راسي علي رجلها
انا تعبت ومش قادر اكتب تاني اندمجت ومحستش بنفسي مش هعرف اكتب تاني صوابعي وجعتني لو عشت وكان ليا عمر هكمل المره الجايه اه ايوا تاني ده حكايه مش محتاجه رد ولا تعليق ولا نقاش يعني اللي عايز يكملها يكملها من غير تعليق واللي مش عايز عادي